«ابدی باریشلار آرزیسییلا»
حاکیمین فیشقاسییلا باشلایاجاغیدی یاریش
ال - آیاغینی ایتیرمیشدی عقربهلر
تلسیردی بایراقلاردا رنگلر
چوخدانییدی قان ایچمهمیشدی قیرمیزلار
چوخ یاشیل یاشامیشدی یاشیللار
گؤی چوخدانییدی گؤیلرده اوزوردو
هر نه حددیندن آرتیق وار اولموشدو
بیر آددیم یوخلوغا
پیس دئییلدی چوخدا
حاکیمین یوخلوغوندا باشلادی ساواش
اؤلومه اوخشایانلار هامیسی واغزالدایدیلار
«گل اوغلان . . . سنین یامان یاراشیر اؤلوم اینینه»
«سن . . . الین باشینا چوخدور، طیارهلره لازیم»
«سن . . . آیاقلارین یوروبدور گؤودهنی، دینجلت مینلری»
«سن . . . گؤزلرین قوشلار کیمی غریب دیر اؤز اؤلکهنده»
عسگرلر
توفنگلرین قونداقلارینی باغریلارینا چکدیلر
آنالار
قونداقدا یاتان کؤرپهلرینی
عسگرلر
آنالارین دؤشلریندن حض آلیردیلار
کؤرپهلر
توفنگلرین امزیییندن باریت امیردیلر
آنالار
هیجان قورخو ایزتیراب نیفرت کدر حسرت آه
هر شئی دوغوردولار آنالیقدان باشقا
آنالار ساواشین قاپ – قارا
قورشوندان ایستی خبرلری . . .
دونیا ایکینجی ساواشییدی
٢١ - ینجی عصرین میراثییدی
تیتره ییردی یئر کورهسینین الی - آیاغی
باشلار آتم بومباسی
آیاقلار تانکلارین دمیر باشماقلاری
اللر طیارهلرین قانادی
سینهلر چین دیواری
گؤزلر قاطارلانمیش گوللـهلر
اینسانلیق آماجایدی
اینسانسا وسیله
دونیا ایکینجی ساواشییدی
بولودلار قاپی آلتیندان سوزولدولر ائولره
توپراق اوتوردو آیین اولدوزون گوموشلویونه
یامان قاریشمیشدی هر نه بیر - بیرینه
واغزاللاردا تلسیردی اؤلوم عسگرلییه
نفسلر دایانمیشدی سنگرلر دالیسیندا
یئر بزنمیشدی جنازهلرله
و جنازهلر
هیندیستانلی قادینلارین آلین اورتاسی خاللارییلا،
سول گؤز آرازین اوتایندا
ساغ گؤز آرازین بو تاییندا
قیپ - قیرمیز چایلار جوشوردو آلینلاردان
یانار داغلار آغیزلاردان
قان داغلاری، داغ قانلاری
یئنی دن یارانیردی دونیا آیریلیقلاردا
یئنی دونیالار یارانیردی آیریلیقلاردا
ایکی ال، اون بارماق، بیر بایراق
آمان ایستهییردی آمان
ایکی ال، دؤرد بارماق، بیر بایراق
« Victory » باغیریردی . . .
دونیا ایکینجی ساواشییدی
کؤچوردو گؤزلر، چؤکوردو دیزلر، اؤتوردو ایزلر
قوشلار قولتوق آغاجلارییلا یورویوردولر
اوچوردولار . . . آما جنازهلرین کابوسلاریندا
یالنیز یورویوردولر یالنیز
یانلیز قوش آدلانیردیلار اوچامادیقلاری اوچون بلکه . . .
***
هله هیندیستاندا ساغلامییدی
طوطیلر، معبدلر، فیللر
یالنیز دونیادان خبرسیز مورتاض
دونیا ایکینجی ساواشینین خبریندن
اود آلدی بئینیندن
آلوو چکدی باتیلار تک
دینمهدیلر طوطیلر
چیخمادی تانری معبدیندن
ائشیتمهدی فیللرین فیل قولاغی
آنجاق بیر آن
دایاندی پارتلاییش آنیندا زامان، دیکسیندی جاهان
کورتاژ اولدو ژاپن قارنیندا هیروشیمایلا ناکازاکی
نه یاخشی! یامان! قورتاردی انیشتین دونیانی!
بؤلونمهدی دونیا ژاپن لا آلمان آراسیندا!
حاکیم چالمیشدی دئیهسن فیشقانی
قورتولموشدو بو اویوندا . . .
***
ایللر ساواشدان سونرا الیمه چاتان فوتورافلار
هله قورخوردولار اؤزلرینده یاشادان
ساواش اینسانلارینین یاشاماسیندان
گؤزهل جنایتلردن
بومبا دوغولان کؤرپهلردن
باش - اوجا یاشایان اعدام آغاجلاریندان
فوتورافلار
باغیریردیلار . . . سیس
چاغیریردیلار . . . سوس
سرگی دن چیخانلار:
- واااااااااای! نه گؤزهلمیش - دئییردیلر . . .
