. . . تانیمادیغیم کیمسه یه سونورام

داریخمالارا دارالیردی روزگارین ساچی . اوزانیردی گلمه مزلییین . نئجه ایستی – ایستی اوره ییمیزه یاپیلدی بو برکتلی آیریلیق . سوسقونلوغومون دؤزوم سوز گونلرینده یدی . سیس های – کویونده توپلاندی لار آنی (خاطیره) لاریمیز  بئینیمین توز باسمیش دیب – بوجاق لاریندان . سن گلدین ایسلاق جاسینا ، یاغیش دان دون گئیمیشدین سانکی . گؤزلرینی اوشاق لیق یوردوندان ، بارماق لارینی یاخشیلیق لاردان هدیه وئره جکدین ، سانکی !

اوف . . . دؤنوشدون دئمه لی ؛ اؤزلم لرین ان اوجا اوجقارلاریندان کؤچوب ، ایچیمه سوزموش –سن بو آن . ایندیسه هانسی اؤزونسوز گونلریمه آچیلیب – سونولاجاقسان ، آی منیم دونوق چیچه ییم . اینان بیر آزدان اوزاق ایل لره جالانار باخیش لاریم، کوچه – کوچه دولانار بئینیم. دام – دوووار دان آشیب – توپلانار کوچه نین بوتون دویغولاریلا بیرگه جور به جور اوشاق اویون لاری . یئنه گؤیرچین لر اوچار ، چیل باسار گؤک اوزو. گؤزلریمیزده سئوینج قالابالیغی ، شاخار شنلیک لر . اوچوشار باخیش لاریمیز ، قاناد دوتارلار موتلولوق لارا . . .

ندنسه «ناققیشلینی» باشلایاراق قوشلار یووالارینا دؤنوشدولر . «ناققیشلی» ائولری . . . بیر ائوین بیریسی ، سن .

الیمده کی داش یامچییا اویموشدوم ، بیرده سنین ائوینه . بیلمیرم ، ندنسه داش گونده ریردیم ائلچی لییینه . دفعه لرله یاندیم . آتدیغیم داش دایانمادی سنسیز ائولرده . نه یامچی داشی چاتمیشدیر سنه ؛ نه من . آما ائنمه میشدیر گؤک قورشاغیندان هله آرزی لاریمیز. . . گؤی گورشاد چاغلاییردی . بولودلار:«گونلرینیزی گؤتوروب قاچین ائوینیزه» - دئییردی لر . هیرسله نیب بیر آن سونرا قاققا چکیردی لر. سئوینج یاغیردی اوزوموزه ، آما ندنسه یوخلوق جالانمیشدیر دیلک ائویمیزه . گاهدان بیرلشیردی یاغیش لا گؤزیاش لاریمیز، زویوردولر بو تایدان او تایا . ائله بیل ایکی سئوگی پایلاشیردی لار وارلیق لارینی . نه ایسه یی اونودوردوق . گؤزیاشلاریمزدا تیتره ییردی صاباح لاریمیز . دالیردیق اوره ییمیزین سیجاقلیغینا . گونلریمیزین نیشانی یاغیشلیق ، ایشیمیزین آدی یاخشیلیق ، دونیامیزین آدی اوشاقلیق . اوخویا – اوخویا کؤچوردوک دویغودان – دویغویا :

یاغدی یاغیش لار

بانلادی قوشلار . . .

کیپریک – کیپریک بوتون سوچ لاردان آریدیلمیش باخیش لاریمیزلا ، سانیردیق آلنیمیزا گؤزه ل گله جک لی طالع لری . یاغیش توکنمیش دیر. «اؤتموشدو ناققیشلی» . کوچه صحیفه سیندن سیلینمیش دیر  دیلک ائویمیز . آزجا آغلامیشدیق . یئنه لده ریک دیلک ائویمیزی یئنی دن – دئمیشدیک . بلکه ده «گیزلن پالانج» اویونوندا تاپدیق دیلک ائویمیزی . . . !

ندنسه اویون باشلانمادان اؤنجه اوره ییمیز اوزولدو . بیز اوغلان لارین مازی لاری – یعنی سنین تک آرزی لاری – جالاندی الیمیزدن ، ائله جه سن ، نَدن قوینونا آلمیش قولچاغینی یعنی سهو ائتمه سم منله دولو سیرداشینی تاپشیردین کوچه نین کؤکسونه . . .

آما بو اویون قورتولوش لاری باشلامیشدیر. گیزلندیک ده سن آلما دئدین ، منسه حئیوا . . . ایتدیک قارا – آلین لیق دا .

یاغدی گؤوده میزه نئچه مین یاشام گره یی . اسدی اوزوموزه نئچه مین شارلاتان الی . دئمک آمان وئرمه دی آیریلیق اله یی .

آ ی ر ی ل د ی ق . نئچه مین اولدوز سایدیق آیری دوشن گونلریمیزی . نئچه مین ایشیق – نئچه مین قارانلیق کؤچموشدو آرامیزا . آیریلمیشدیق نئچه مین دیلک دن . نئچه مین آزالمیشدیر بوتونلویوموزدن .

ایندیسه ایل لردیر داها هئچ بیر گؤزدن آلما دَره بیلمه میشم . دیلیم هئیوالانیب و ائله دوشونورم سن هئیوا دئمیشسن بوتون صاباح لارا . . . آلما چاغریلیبسان بوتون اوجقارلاردان  . . .

آزجا ایلین ده ییشمه سینه ، سن سیزلیک لرین دؤنوشمه سینه قالدی ! بیلمیرم نئجه چکه جه یم گؤوده می یئنه سن سیزلییه ! . بیلیرم ، گوندن – گونه قاتماق باغلایاجاق یوخلوغون ، چییین لریمده . اولدوز قانادلاریم یارالاناجاق . اوچا بیلمه یه جه یم یوخو یوللارینا بیرده . گؤروشه بیلمه یه جه ییک . آی گؤزلرینی اؤپه بیلمه یه جه یم گوموش دوداق لاریملا . آخسایاجاق باخیش لاریم .

دؤنوشمه کده دیر گولوم ! . یوخلوغونون آردیجیللیغینا دؤنوشه جک . منسه یئنی لیک لری اه ینیمه تاخیب ، گؤزله ریمده تیکرار ائده رم بوشلوغونا یوزوملانان گونلری . بیر نئچه یوز گون داها ، آجی چکمه یه یئنی له نیب ، یؤنله جک گونلریم .

دؤنوشمه کده دیر آیدین آیریلیق لار . یئنه سن سیز لیییه دؤشنجک بایرام سوفرامیز . یئنه بوتون  «س»لار سارالاجاق . یعنی «سارا» طالعی سارماشار بوتون گونلره .

ایل لر ، «سن سیزلییی» کادولار منه ، بایرام سوفراسی ، بیر بالیق لئشینی . . . ؛ ایل لردی پاییم بللی دی !

دونوشور یئنی ایل ، دؤنوشور سوسقونلوغون آغیرلیغی دیلیمه ، ایلغیم لارین لپه لنمه سی گؤزومه ، آسمان بویوندا یوخلوغون بئینیمه .

یئنی یوخلوغون قوتلو اولسون .